Ingredientët:

• 6 – 8 copa mish qengji
• 1 litër kos
• 1 litër lëng mishi qengji
• 1 lugë çaji hudhra të grira
• 1 lugë gjelle plot miell
• 2 lugë gjelle plot miell misri
• 5 kokrra vezë
• 8 lugë gjelle vaj ulliri
• 1 filxhan kafe oriz
• ½ lugë çaji kripë

Përshkrimi:

Në fillim pastrojmë dhe ziejmë mishin e qengjit, më pak kripë dhe 1 litër e ½ ujë, pas kësaj e heqim mishin, kullojmë lëngun dhe i lëmë mënjanë të ftohen.

Ndërkohë që lëngu ftohet fillojmë përgatitjen e tavës së kosit ku në një enë të thellë përziejmë mirë vezët, të cilat i ke rrahur pak më parë, vazhdojmë duke shtuar kosin, miellrat, vajin, kripën, hudhrat e grira.

Pasi kemi përftuar një masë homogjene fillojmë shtojmë lëngun e mishit të cilin e kemi kulluar më parë dhe e lëm mënjanë.

Në një tepsi vendosim copat e mishit të qengjit, shpërndajmë gjithandej nëpër fundin e tepsisë orizin të cilin e kemi pastruar më parë dhe hedhim përzierjen e sipërme me kosin, vezët dhe lëngun e mishit.

Mbi çdo copë mishi vendosim një lugë çaji gjalpë në mënyrë që mishi të qëndroji i butë gjatë pjekjes.

E pjekim në furrë të para ngrohur 200°C për 1 orë e 30 – 40 minuta ose derisa tava të mos ketë më lëng.